మదర్సాలో అమానుషం: టాయిలెట్‌లో 40 మంది బాలికల బందీ.. తనిఖీల్లో బయటపడ్డ దారుణం!

ఉత్తరప్రదేశ్‌లో దారుణమైన ఘటన ఒకటి వెలుగులోకి వచ్చింది. అక్రమంగా నడుపుతున్న ఓ మదర్సాలో తనిఖీలకు వెళ్లిన అధికారులకు దిగ్భ్రాంతికర దృశ్యం ఎదురైంది. టెర్రస్‌పై ఉన్న ఓ మరుగుదొడ్డిలో ఏకంగా 40 మంది బాలికలను బంధించి ఉంచిన అమానుషం బయటపడింది. అధికారుల రాకను గమనించిన నిర్వాహకులు, బాలికలను దాచిపెట్టేందుకు ఈ దారుణానికి పాల్పడినట్లు తెలుస్తోంది.

వివరాల్లోకి వెళితే, బహ్రైచ్ జిల్లా పరిధిలోని పహల్వారా గ్రామంలో మూడంతస్తుల భవనంలో గత మూడేళ్లుగా ఓ మదర్సాను ఎలాంటి రిజిస్ట్రేషన్ లేకుండా అక్రమంగా నిర్వహిస్తున్నారని అధికారులకు ఫిర్యాదులు అందాయి. ఈ నేపథ్యంలో, పయాగ్‌పూర్ సబ్ డివిజనల్ మేజిస్ట్రేట్ (ఎస్డీఎం) అశ్విని కుమార్ పాండే నేతృత్వంలోని బృందం ఆకస్మిక తనిఖీ చేపట్టింది.

తనిఖీ కోసం భవనంలోకి ప్రవేశించిన అధికారులను నిర్వాహకులు అడ్డుకునే ప్రయత్నం చేశారు. ముఖ్యంగా పై అంతస్తుకు వెళ్లకుండా నిలువరించారు. దీంతో అనుమానం వచ్చిన అధికారులు, పోలీసుల సహాయంతో పైకి వెళ్లారు. అక్కడ టెర్రస్‌పై ఉన్న ఓ టాయిలెట్‌కు బయట నుంచి తాళం వేసి ఉండటాన్ని గమనించారు.

మహిళా పోలీసుల సమక్షంలో ఆ తాళాన్ని పగలగొట్టి చూడగా లోపల ఉన్న దృశ్యం అందరినీ కలచివేసింది. 9 నుంచి 14 సంవత్సరాల వయసున్న సుమారు 40 మంది బాలికలు భయంతో వణికిపోతూ కనిపించారు. వారిని బయటకు తీసుకురాగా, తీవ్రమైన భయాందోళనతో ఎవరూ మాట్లాడలేకపోయారని అధికారులు తెలిపారు.

ఈ ఘటనపై ఎస్డీఎం అశ్విని కుమార్ పాండే స్పందిస్తూ, మదర్సా రిజిస్ట్రేషన్ మరియు దాని చట్టబద్ధతపై నివేదిక ఇవ్వాలని జిల్లా మైనారిటీ సంక్షేమ అధికారి మొహమ్మద్ ఖలీద్‌ను ఆదేశించినట్లు చెప్పారు. అయితే, ఈ విషయంపై తమకు ఇప్పటివరకు ఎటువంటి ఫిర్యాదు అందలేదని, ఒకవేళ ఎవరైనా ఫిర్యాదు చేస్తే చట్ట ప్రకారం కఠిన చర్యలు తీసుకుంటామని ఓ పోలీస్ అధికారి వివరించారు. ఈ ఘటనపై అధికారులు లోతుగా దర్యాప్తు చేస్తున్నారు.